ტურიზმი - ეს არის სფერო, რომელიც მიიჩნევა ეკონომიკის პრიორიტეტულ ელემენტად. შესაბამისად, მნიშვნელოვანია საზოგადოებას, მთავრობას, ფერმერებსა და ყველა იმ ადამიანს, რომელსაც პირდაპირ თუ ირიბად მანც ეხება ეს სფერო, ესმოდეს, რომ ტურიზმის განვითარებისთვის აუცილებელია ქვეყანაში არსებობდეს შესაბამისი პირობები.
მოგეხსენებათ, თუ რაოდენ მნიშვნელოვანია ქვეყნისთვის ტურისტული პოტენციალის გაღრმავება და ამისათვის ხელთარსებული რესურსების მაქსიმალურად გამოყენება. ფაქტია, რომ ტურიზმის საქმიანობის წვლილი ძალზედ დიდია ქვეყნის ეკონომიკასა და მისი საერთაშორისო შესაძლებლობების განვითარებაში. როცა ვსაუბრობთ ტურიზმის პოტენციალის გაღრმავებასა და განვითარებაზე, მნიშვნელოვანია აღვნიშნოთ, რომ საჭიროა ახალი მეთოდებისა და მიმართულებების დანერგვა, რომლებიც უზრუნველყოფს ახალ, საჭიროებებსა და რესურსებზე მორგებულ ტურიზმის განვითარების სტრატეგიას. ამ მხრივ ყურადსაღებია ფერმერული მეურნეობის ტურისტულ პროდუქტად ქცევა. ფაქტობრივად, ამით იქმნება ახალი, მოთხოვნადი და ტურისტისათვის მიმზიდველი შესაძლებლობა.
- ,,იმისათვის, რომ ფერმერული მეურნეობა იქცეს ტურისტულ პროდუქტად ძალზედ მნიშვნელოვანია შესაბამისი პირობების შექმნა. უსაფრთხო გარემო, სანახაობრივი და მიმზიდველი სივრცე, საინტერესო და კრეატიული მიდგომებით ასახული რეალობა - ეს იმ ელემენტების მცირე ჩამონათვალია, რომლებიც ვფიქრობ, რომ აუცილებელია ახალი ტურისტული პროდუქტის შესაქმნელად. მაგალითად, ავიღოთ საფუტკრე მეურნეობა. აქ - ვიზიტორმა რომ შეძლოს მონაწილეობის მიღება კონკრეტული სეზონითვის დამახასიათებელ საქმიანობაში, ტურისტი უნდა გახდეს მეფუტკრის საქმიანობის თანამონაწილე - მან მეფუტკრესთან ერთად უნდა გახსნას, დაათვალიეროს და შეწამლოს სკები, ნახოს, თუ როგორაა შესაძლებელი თაფლის მოსავლის აღება და დახარისხება. გარდა ჩვეულებრივი სკისა, ჩვენ გვაქვს ტრადიციული ჯარა, რომელიც ღირებული კულტურული მემკვიდრეობაა. აქ ადამიანს ნაკლებად აქვს შეხება ფუტკართან, რაც მას განსაკუთრებულს ხდის. ამ შემთხვევაში საჭიროა, ტურისტს გავაგებინოთ ჯარას მნიშვნელობა და განსაკუთრებულობა. ასე რომ, საფუტკრე მეურნეობა თავისუფლად შესაძლებელია იქნეს გამოყენებული ტურისტულ პროდუქტად. ამისათვის საჭიროა, შემუშავდეს ხარიხიანი, უსაფრთხო და კრეატიული ტურისტული პროდუქტი“ - ლელა ფუტკარაძე, არასამთავრობო ორგანიზაციის, „საორსა“, აღასრულებელი საბჭოს წევრი
შავი ზღვის სანაპირო ზოლი, დიდი და მცირე კავკასიონის მთაგრეხილები, კურორტები, რომელთა რაოდენობა 102- მდეა და ამავდროულად, კარგი საკურორტო პერსპექტივების მქონე 182 საკურორტო ადგილი - ეს არის ძირითადი ელემენტები, რითიც განსაზღვრავენ ტურიზმის შესაძლებლობებს. თუმცა, თანამედროვე სამყაროში აუცილებელია შორსმიმავალი გეგმები და პრაქტიკული მნიშვნელობის გადაწყვეტილებები, რომლებიც სამომავლოდ წარმატებული ტურიზმის მყარი გარატი იქნება.
ადამიანებისთვის ყველაზე ღირებული მოგზაურობა არის მაშინ, როცა თავს გრძნობენ კომფორტულად და მოგზაურობა მათთვის არის სასიამოვნო განტვირთვა. ეს კი, უმეტეს შემთხვევაში ხდება, როცა ადამიანები ცოტა ხნით ნებაყოფლობით შორდებიან ცივილიზაციის დაძაბულ რიტმს და ბუნებასთან ყოველდღიური ურთიერთობით იკრებენ ძალას.
- ,,მე ვიყავი პირველი მერცხალი აჭარაში, მე ვიყავი ის, ვინც სოფლის ტურიზმს დაუდო საფუძველი. ძალიან ბევრი გამოწვევა შემხვდა გზად, მაგრამ მქონდა მოტივაცია, შესაბამისად, მაქვს შედეგიც. მას შემდეგ 15 წელი გავიდა, იმ დროიდან მოყოლებული სულ ვფიქრობდი, რომ რა შეიძლება შევთავაზო ტურისტებს ისეთი, რაც მათ მიიზიდავს და მასში განსხვავებულს დაინახავენ, ეს ხომ მათ ძალიან მოსწონთ. მე ვფიქრობ, მნიშვნელოვანია შეიქმნას, დაიხვეწოს და განვითარდეს ფერმერული მეურნეობა, როგორც ტურისტული პროდუქტი. ამის ერთ-ერთ მაგალითად შემიძლია დავასახელო თამბაქოს წარმოება. ძალიან კარგი იქნება, რომ მოეწყოს ტური - თამბაქოს მოყვანის, მოვლის, მოსავლის აღებისა და დაგემოვნების შესახებ. თამბაქოს დათესვა, ჩითილის გამოყვანა, გადარგვა, გათოხნვა, მოსავლის აღება, გაშრობა, დაჭრა და ა.შ - ეს პროცესები ტურისტს გაუღმავებს ინტერესს, და შესაბამისად, ბევრად მეტი ვიზიტორი გვეყოლება.“ - ზებურ ბოლქვაძე, ტურისტული მეურნეობა „ზებოს“ დამფუძნებელი.
ფერმა, მეურნეობა - ერთი მხრივ, ტურისტებს იზიდავს, მეორე მხრივ კი სარგებელი მოაქვს სოფლის მოსახლეობისთვისაც - ორივე მხარე მოტივირებულია და შედეგიც ბევრად უკეთესია. თუმცა საბოლოოდ მიზნი, ფერმერული მეურნეობის ტურისტულად ქცევა, მიიღწევა სახელმწიფოს აქტიური ჩართულობით, რაც ბიუროკრატიული ბარიერების შემცირებას, საკანონმდებლო წამახალისებელი მექანიზმების დანერგვას და კერძო სექტორთან მჭირდო თანამშრომლობას ნიშნავს.
ავტორი: ლიზა ანთაძე
სოფლის ტურიზმი აგრო-ტურიზმი სოფლის მეურნეობა
